امریکہ میں فوجی ٹریننگ کے دوران 3 امریکی فوجی ہلاک

مہر خبررساں ایجنسی نے ایسوسی ایٹڈ پریس کے حوالے سے نقل کیا ہے کہ امریکی ریاست جارجیا میں فوجی ٹریننگ کے دوران پیش آنے والے ایک حادثے میں 3 فوجی اہلکار ہلاک اور 3 زخمی ہوگئے۔ اطلاعات کے مطابق امریکی ریاست جارجیا میں واقع فوجی علاقے فورٹ اسٹیورٹ کی تربیت گاہ میں اہلکاروں کو فوجی مشقوں کے تحت ضروری تربیت دی جارہی تھی کہ اس دوران جنگی ٹینک کو حادثہ پیش آگیا ،جس کے نتیجے میں 3 اہلکار ہلاک اور 3 زخمی ہوگئے۔

امریکی فوج کی جانب سے حادثے سے متعلق تفصیلات بتانے سے گریز کیا جا رہا ہے تاہم حکام کا کہنا ہے کہ تفتیش مکمل ہونے کے بعد ہی میڈیا کو حادثے کی نوعیت، متاثرین کی شناخت اور دیگر تفصیلات سے آگاہ کیا جا سکے گا۔ زخمیوں کو ون آرمی کمیونیٹی کے اسپتال میں علاج فراہم کیا جارہا ہے۔