چین نے دفاعی اخراجات میں 7 فیصد اضافے کا اعلان کردیا

مہر خبررساں ایجنسی نے شینہوا کے حوالے سے نقل کیا ہے کہ امریکہ  کے نئے صدر ڈونلڈ ٹرمپ کی جانب سے ملکی دفاعی بجٹ میں اضافے کے فیصلے کے چند روز بعد ہی چین نے بھی رواں برس کے دوران دفاعی اخراجات میں 7 فیصد اضافے کا اعلان کردیا ہے۔چین کی جانب سے اضافے کا اعلان بیجنگ میں سالانہ نیشنل پیپلز کانگریس کے انعقاد سے قبل سامنے آیا ہے۔دفاعی بجٹ میں 7 فیصد اضافے کے باوجود بھی دفاع کے شعبے میں چین کے اعلانیہ اخراجات امریکہ کی نسبت کم رہیں گے، تاہم بیشتر چینی مبصرین کا خیال ہے کہ اصل اعداد و شمار اس سے کہیں زیادہ ہوسکتے ہیں۔ واضح رہے کہ گذشتہ چند سال میں معیشت میں بہتری کے ساتھ ساتھ چین نے اپنے ہتھیاروں کو بھی جدید کیا ہے۔چینی فوج نے گذشتہ ماہ بھی فوجی مشقوں میں جدید ڈی ایف 16 میڈیم رینج بیلسٹک میزائل کے استعمال کی ویڈیو جاری کی تھی۔