پشاورمیں ایف سی کی گاڑی کے قریب دھماکہ، 3 اہلکار ہلاک

مہر خبررساں ایجنسی نے پاکستانی ذرائع کے حوالے سے نقل کیا ہے کہ پاکستان کے صوبہ خیبر پختون خواہ کے شہر پشاور میں ایف سی کی گاڑی کے قریب دھماکے کے نتیجے میں 3 اہلکار ہلاک جب کہ 3 زخمی ہوگئے ہیں۔ پشاورمیں بشیرآباد کے علاقے میں ایف سی کے جوان گاڑی میں معمول کے گشت پرتھے کہ اچانک دھماکہ ہوگیا۔ جاں بحق اورزخمی اہلکاروں کو فوری طورپرسی ایم ایچ پشاورمنتقل کردیا گیا، جہاں زخمیوں کو طبی امداد فراہم کی جارہی ہے۔ ایس ایس پی آپریشنزپشاورپولیس نے جائے وقوعہ پرمیڈیا سے بات کرتے ہوئے کہا کہ دھماکے میں ایف سی کے اہلکاروں کو نشانہ بنایا گیا، اس سلسے میں دہشت گردوں نے سڑک کنارے بارودی مواد نصب کررکھا تھا جسے ریموٹ کنٹرول کی مدد سے اڑایا گیا۔