پانچ سو اورہزار کے نوٹوں کی منسوخی سے غریبوں کو نقصان ہوگا، راہول گاندھی

مہر خبررساں ایجنسی نے ہندوستانی ذرائع کے حوالے سے نقل کیا ہے کہ کانگریس کے نائب صدر راہول گاندھی نے وزیر اعظم مودی کو سخت تنقید کا نشانہ بناتے ہوئے کہا ہے کہ پانچ سو اورہزار کے نوٹوں کی منسوخی کے بعدامیروں کو فائدہ اورغریبوں کو نقصان ہوگا۔ انہوں نے مودی حکومت پر تنقید کرتے ہوئے یہ بھی کہا ہے کہ مودی بلٹ ٹرینوں پر تقریریں کرتے ہیں لیکن ریلوے ٹریک کی بحالی اور حفاظت کیلئے کوئی کام نہیں کرتے۔ راہول گاندھی نے کہا کہ مودی اپنے وزراء سے کچھ نہیں پوچھتے جو دل میں آتا ہے کر ڈالتے ہیں، آج کل مودی پر نیا روپ چڑھا ہوا ہے جسے لفظوں میں بیان کرنے کیلئے نیا لفظ نکالنا پڑے گا۔ ان کا مزید کہنا تھا کہ مودی اپنے اقدامات سے 15 لوگوں کی تجوریاں بھریں گےاورقرضے معاف کریں گے، مودی کے اقدام سے غریب لوگ قطاروں میں کھڑے ہوں گے۔