روسی طیارہ بم کے ذریعے تباہ ہوا ہے، امریکی و برطانوی انٹیلی جنس

مہر خبررساں ایجنسی نے رائٹرز کے حوالے سے نقل کیا ہے کہ امریکی اور برطانوی انٹیلی جنس حکام کے مطابق مصر میں روسی جہاز کو بم کے ذریعے تباہ کیا گیاہے۔ ان کا یہ بھی کہنا ہے کہ ابھی اس حوالے سے کسی باقاعدہ نتیجے پر پہنچنا باقی ہے۔ طیارے کی تباہی میں جہاز کے کاک پٹ کا وائس ریکارڈر بہت بری طرح تباہ ہوا تھا تاہم شہری ہوا بازی کے ادارے کے مطابق فلائٹ کے ڈیٹا ریکارڈر سے معلومات نکال لی گئی ہیں جو ماہرین کے جائزے کے لیے تیار ہیں۔ برطانوی حکومت کی کرائسس رسپانس کمیٹی کے اجلاس کے بعد وزیرِ خارجہ فلپ ہموند نے صحافیوں کو بتایا کہ ’ہم اس نتیجے پر پہنچے ہیں کہ یہ امکان ہوسکتا ہے کہ جہاز کی تباہی اس میں موجود دھماکہ خیز ڈیوائس کی وجہ سے ہوئی۔‘برطانوی حکومت نے بدھ کو کہا تھا کہ شاید جہاز کو کسی دھماکہ خیز ڈیوائس کی مدد سے زمین تک لایا گیا۔ ایک امریکی افسر نے شناخت ظاہر نہ کرنے کی شرط پر بتایا کہ مواصلاتی ذریعے سے پکڑے جانے والے پیغامات سے محسوس ہوتا ہے کہ صحرائے سینا میں موجود داعش کے ایک حامی نے دھماکہ خیز ڈیوائس کو جہاز میں نصب کیا تھا۔ تاہم حکام نے اس بات پر زور دیا ہے کہ ابھی فورینزک شواہد اور بلیک باکس کا مشاہدہ کیا جا رہا ہے۔