پاکستان مسلم لیگ ن کے سردار ایاز صادق قومی اسمبلی کے اسپیکر منتخب

مہرخبررساں ایجنسی نے پاکستانی ذرائع کے حوالے سے نقل کیا ہے کہ پاکستان مسلم لیگ ن کے سردار ایاز صادق 258ووٹ لے کر پاکستان کی قومی اسمبلی کے اسپیکر منتخب ہوگئے ہیں۔پاکستان پیپلز پارٹی کی جانب سے اسپیکر اور ڈپٹی اسپیکر کے کاغذات نامزدگی واپس لئے جانے کے بعد مسلم لیگ ن کے سردار ایاز صادق، تحریک انصاف کے شہریار آفریدی اور ایم کیو ایم کے ایس اے اقبال قادری کے درمیان مقابلہ تھا۔اسپیکر قومی اسمبلی فہمیدہ مرزا کی زیرصدارت قومی اسمبلی کے اجلاس میں نئے اسپیکر کا انتخاب خفیہ رائے شماری کے ذریعے کیا گیا۔اجلاس کا آغاز تلاوت کلام پاک سے ہوا جس کے بعد اراکین اسمبلی نے فرداً فرداً اپنا ووٹ کاسٹ کیا۔مسلم لیگ ن کے سردار ایاز صادق نے258،تحریک انصاف کے شہریار آفریدی نے31جبکہ ایم کیو ایم کے ایس اے اقبال قادری نے23ووٹ حاصل کیے۔سردار ایاز صادق لاہور کے حلقے این اے 122 سے پاکستان تحریک انصاف کے سربراہ عمران خان کو شکست دے کر تیسری بار قومی اسمبلی کے رکن بنے۔ ایاز صادق 2002ء میں قومی اسمبلی کی قائمہ کمیٹی برائے ریلوے کے ممبر اور 2008ء میں قائمہ کمیٹی برائے ریلوے کے چیئرمین رہ چکے ہیں۔